Í vikunni var greint frá því að búið sé að leggja fram á Alþingi þingsályktunartillögu um að hefja rannsóknir á jarðlögum og hafsbotni á fyrirhugaðri gangaleið milli lands og Vestmannaeyja. Flutningsmenn tillögunnar eru Karl Gauti Hjaltason, þingmaður Miðflokksins og Vilhjálmur Árnason, þingmaður Sjálfstæðisflokks.

Karl Gauti sagði í samtali við Eyjafréttir að hann hafi boðið öllum þingmönnum kjördæmisins að vera með á tillögunni.

Eyjafréttir leituðu skömmu fyrir síðustu þingkosningar til oddvita allra flokka sem buðu fram til þings og báðu um þeirra afstöðu til málsins. Hér að neðan má sjá svör þeirra framboða sem náðu mönnum inn á þing. Spurt var: Hyggst flokkurinn beita sér fyrir því að tryggja fjármuni til rannsókna á jarðlögum vegna Vestmannaeyjaganga?

Svör ríkisstjórnarflokkanna

Byrjum á að skoða hvað oddvitar ríkisstjórnarflokkanna í Suðurkjördæmi sögðu í nóvember sl.

Í svari Flokks fólksins sagði að Ásthildur Lóa Þórsdóttir, oddviti flokksins í Suðurkjördæmi að hún sé fylgjandi því að tryggja fjármagn fyrir þessa rannsókn.

Víðir Reynisson, oddviti Samfylkingarinnar svaraði spurningunni þannig: „Fyrirspurn um hvort við munum styðja við fjármögnun rannsóknar vegna jarðganga er mjög fljót svarað…já!“

Guðbrandur Einarsson oddviti Viðreisnar svaraði eftirfarandi: „Ég mun að sjálfsögðu styðja það að þetta verkefni fái framgang. Það er nauðsynlegt að fá vitneskju um hvort göng séu fýsilegur kostur eða ekki. Fyrsta mál er að tryggja þessar 60 milljónir og það getur ráðherra málaflokksins gert. Öðru þarf að ná í gegn í fjárlögum til þess að tryggja framgang málsins til lengri tíma.“

Svör stjórnarandstöðuflokka

Í svari Guðrúnar Hafsteinsdóttur oddvita Sjálfstæðisflokksins í Suðurkjördæmi sagði: „Ég hef lengi lagt áherslu á bættar samgöngur á Suðurlandi og styð þrepaskipta rannsókn á fýsileika jarðganga til Vestmannaeyja. Ég mun beita mér fyrir því að tryggja fjármagn til þessa mikilvæga verkefnis.“

Í svari Miðflokksins og Karls Gauta Hjaltasonar, oddvita flokksins í Suðurkjördæmi sagði: „Já, við munum tryggja fjármuni til að fara í nauðsynlegar rannsóknir svo unnt verði að taka upplýsta ákvörðun um framhald verkefnisins. Þetta er mikilvægt skref til að meta fýsileika jarðgangna milli lands og Vestmannaeyja, og við teljum að rannsóknir á jarðlögum séu nauðsynlegar til að varpa skýrara ljósi á kostnað og ávinning verkefnisins. Við teljum að áframhaldandi rannsóknir og gagnasöfnun séu grunnforsenda til að hægt sé að taka upplýsta ákvörðun um þessa mikilvægu framkvæmd.“

Í svari frá Höllu Hrund Logadóttur sagði orðrétt: Við í Framsókn skiljum vel mikilvægi samgöngubóta fyrir Vestmannaeyjar og möguleg áhrif slíkra framkvæmda á atvinnulíf og lífsgæði íbúa. Framsókn hefur tekið samgöngumál til Vestmannaeyja alvarlega og sá stuðningur sem birtist meðal annars í rafvæðingu Herjólfs, því að rekstur hans sé í höndum heimamanna og stuðningi við Landeyjahöfn. Við fögnum því að þessi vinna sé komin af stað og munum setja fjármagn í hana á næsta kjörtímabili.

Við munum áfram fylgjast náið með þróun málsins og vinna að því að leita að bestu lausnum fyrir íbúa svæðisins. Með því vonumst við til að framþróun í þessum málum verði bæði farsæl og sjálfbær til lengri tíma.

Auk samgangna mun Framsókn leggja áherslu á frekari uppbyggingu atvinnulífs og innviða í Vestmannaeyjum. Nefni ég sem dæmi mikilvægi þess að pólitíkin ljúki innleiðingu vatnaáætlunar svo að hægt sé að hraða útgáfu landeldisleyfa. Það er mikið hagsmunamál. Annað mikið hagsmunamál fyrir Vestmannaeyjar er að nauðsynlegt er að klára framkvæmdir til að styrkja flutningskerfið til þess að draga úr skerðanlegum orkusölusamningum og flutningi fyrir bræðslurnar þar. Mörg fyrirtæki í Vestmannaeyjum eru á skerðanlegri orku og flutningi og með Vestmannaeyjalínum 4 og 5 er hægt að tryggja að flutningsgetan sé fullnægjandi þannig að ekki sé lengur þörf á skerðanlegum flutningi.

Ég mun því fylgjast náið með þróun þessara mála, bæði innviðauppbyggingu og samgöngumálum fyrir samfélagið í Vestmannaeyjum. Markmið okkar er að stuðla að farsælum lausnum til lengri tíma fyrir eyjarnar, sagði í svari Höllu Hrundar í nóvember.

Af þessu má sjá að allir flokkar svöruðu þessari spurningu skýrt og á sömu leið. Næsta skref í málinu er fyrsta umræða á þingfundi og munu Eyjafréttir fylgjast áfram með þessu mikilvæga máli.