Undirbúningur fyrir Þjóðhátíð náði enn einum stórum áfanga í kvöld þegar þjóðhátíðargestir flykktust í Herjólfsdal til að setja niður súlur fyrir hvítu tjöldin.

Mikið líf var í Dalnum þegar tjaldsúlunum var komið fyrir á úthlutuðum lóðum. Hvítu tjöldin eru órjúfanlegur hluti af Þjóðhátíð og þegar súlurnar rísa er óhætt að segja að hátíðarstemningin sé farin að magnast verulega.

Næsta skref er að flytja búslóðina í Dalinn og koma tjöldunum upp. Þjóðhátíðarnefnd biður fólk um að virða vel þær tímasetningar sem gefnar hafa verið upp fyrir flutningana. Þegar Dalurinn er lokaður sé meðal annars unnið þar með stór vinnutæki og verið að koma vörum og öðrum búnaði inn á hátíðarsvæðið.

Einnig er minnt á að fjölmargir sjálfboðaliðar leggja hönd á plóg við undirbúninginn og þurfi að komast heim á skikkanlegum tíma til að undirbúa sína eigin Þjóðhátíð.

„Gerum þetta saman í sátt og samlyndi, það er upphafið að góðri hátíð,“ segir í tilkynningu ÍBV. Óskar Pétur Friðriksson, ljósmyndari Eyjafrétta, leit við í Herjólfsdal í kvöld og fangaði stemninguna þegar súlurnar voru settar niður í blíðunni.