Karlalið ÍBV í handbolta mætir Fram á útivelli í Olísdeildinni í kvöld. Flautað verður til leiks í Lambhagahöllinni klukkan 18:00.

Fram hefur farið vel af stað og unnið báða leiki sína. Liðið vann Þór 38:34 í fyrstu umferð og fylgdi því eftir með 47:40 útisigri á Val. Fram er í öðru sæti deildarinnar með fjögur stig, jafnmörg og Haukar og KA.

ÍBV er í áttunda sæti með tvö stig. Eyjamenn töpuðu 38:29 fyrir Haukum í fyrstu umferð en svöruðu fyrir sig með 30:27 sigri á Selfossi í fyrsta heimaleik tímabilsins.

Heil umferð fer fram í Olísdeild karla í kvöld. Leikur Fram og ÍBV ríður á vaðið klukkan 18:00. Þá mætast HK og Valur klukkan 18:30, KA og Þór klukkan 19:00, FH og Víkingur klukkan 19:15, Haukar og Afturelding klukkan 19:30 og Selfoss og Stjarnan klukkan 19:45.

Eyjamenn freista þess að fylgja fyrsta sigrinum eftir gegn sterku liði Fram. Leikurinn hefst klukkan 18:00 og verður sýndur í beinni útsendingu á Handboltapassanum.