Kvennalið ÍBV tók á móti Fylki í eina leik kvöldsins í 9. umferð Lengjudeildar kvenna. Leikurinn fór fram á Þórsvelli og voru Eyjastelpur með mikla yfirburði í leiknum. Allison Patricia Clark skoraði fyrsta mark leiksins á 12. mínútu með góðum skalla eftir hornspyrnu Olgu Sevcovu. Aðeins þremur mínútum síðar bætti hún svo við öðru marki aftur eftir sendingu frá Olgu Sevcovu sem hafði átt frábæran sprett upp völlinn. Olga lagði svo boltann fyrir Clark og eftirleikurinn auðveldur fyrir hana.  Eyjakonur voru í miklu stuði í fyrri hálfleik og bættu við tveimur mörkum áður en flautað var til hálfleiks. Viktorija Zaicikova skoraði  á 42. mínútu eftir fyrirgjöf frá Allison Lowrey og Lowrey skoraði svo fjórða markið þremur mínútum síðar. 

Eyjakonur héldu áfram að sækja að marki Fylkis í seinni hálfleik og á 83. mínútu kom loks fimmta markið eftir vel útfærða aukaspyrnu en það var Sandra Voitane sem tók spyrnuna. Hún renndi boltanum á Kristínu Klöru Óskarsdóttir sem átti góða fyrirgjöf og Helena Hekla Hlynsdóttir kláraði af miklu öryggi. Frábær leikur hjá stelpunum sem eru á mikilli siglingu. 

Eftir leikinn er ÍBV á toppi Lengjudeildarinnar með 22. stig en Fylkir er í fallbaráttunni með 6.stig.

Stelpurnar mæta næst Grindavík/Njarðvík föstudaginn 4. júlí kl. 18:00. Ekki er komið á hreint hvort leikurinn fari fram á Þórsvelli eða Hásteinsvelli.