Karlalið ÍBV í handbolta tapaði naumlega með einu marki, 29-28, gegn KA í lokaleik 18. umferðar Olís deildar karla, á Akureyri í dag. 

Eyjamenn voru með yfirhöndina í byrjun leiks og náðu þriggja marka forystu, 4-7, eftir tíu mínútur. KA menn jöfnuðu leikinn eftir 20. mínútur í 10-10 en Eyjamenn náðu aftur upp forskoti og var staðan 13-15 í hálfleik. 

ÍBV komst fimm mörkum yfir strax á upphafsmínútum síðari hálfleiks og var staðan 15-19. Þegar stundarfjórðungur var eftir minnkuðu KA menn muninn í 20-22. Lokamínútur leiksins voru æsispennandi en eftir að Eyjamenn voru komnir með fjögurra marka forystu, náðu KA menn að jafna leikinn í 24-24, þegar átta mínútur voru til leiksloka. Á lokakafla leiksins komust KA menn yfir í fyrsta skipti í leiknum og voru sterkari undir lokin. Staðan var 28-28 þegar þrjár mínútur voru eftir en KA menn skoruðu sigurmarkið og unnu að lokum 29-28, eftir misheppnaðar tilraunir Eyjamanna til að jafna leikinn.

KA menn komust með sigrinum upp fyrir ÍBV og eru í 5. sæti með 24 stig og Eyjamenn í því sjötta með 23 stig.

Einar Rafn Eiðsson, leikmaður KA, var markahæstur í leiknum með níu mörk en atkvæðamestir í liði Eyjamanna voru Andri Erlingsson og Hákon Daði Styrmisson með sjö mörk hvor. Petar Jokanovic varði tíu skot í marki ÍBV og Morgan Goði Garner eitt. Haukur Leó Magnússon, leikmaður ÍBV, fékk að líta rauða spjaldið á 47. mínútu. 

Mörk ÍBV: Andri Erlingsson 7 mörk, Hákon Daði Styrmisson 7, Dagur Arnarsson 3, Daníel Þór Ingason 3, Elís Þór Aðalsteinsson 3, Sveinn José Rivera 3, Nökkvi Snær Óðinsson 2. 

Næsti leikur Eyjamanna er gegn ÍR í Eyjum, fimmtudaginn 5. mars kl. 18:00.