Bæjarstjórn Vestmannaeyja samþykkti á fyrsta fundi sínum að ráða Írisi Róbertsdóttur áfram í starf bæjarstjóra Vestmannaeyjabæjar til næstu fjögurra ára.

Tillagan var samþykkt með atkvæðum allra fimm bæjarfulltrúa Sjálfstæðisflokksins. Tveir bæjarfulltrúar Miðflokksins greiddu atkvæði gegn tillögunni en tveir bæjarfulltrúar Eyjalistans sátu hjá.

Við afgreiðslu málsins lagði Miðflokkurinn fram breytingartillögu þar sem lagt var til að Trausti Hjaltason yrði ráðinn bæjarstjóri í stað Írisar.

Í greinargerð með tillögunni sögðu bæjarfulltrúar Miðflokksins að tímabært væri að ráðast í breytingar á embætti bæjarstjóra samhliða breytingum á skipan bæjarstjórnar. Þar vísuðu þeir meðal annars til umræðu um starfsanda og framkomu gagnvart starfsfólki innan sveitarfélagsins og sögðu sveitarfélagið þurfa nýja forystu sem gæti byggt upp traust, eflt samstarf og skapað jákvætt starfsumhverfi til framtíðar.

Breytingartillagan fékk stuðning tveggja bæjarfulltrúa Miðflokksins en var felld með sjö atkvæðum bæjarfulltrúa Sjálfstæðisflokks og Eyjalista. Í kjölfarið var tillaga um ráðningu Írisar Róbertsdóttur og ráðningarkjör hennar borin upp og samþykkt.

Íris hefur gegnt starfi bæjarstjóra Vestmannaeyja frá árinu 2018 og mun með þessari ákvörðun gegna embættinu áfram á kjörtímabilinu 2026–2030. Hér má sjá nýjan ráðningarsamning bæjarstjóra.