Eyjablikk ehf. er blikk og stálsmiðja sem hefur verið starfrækt um áraraðir. Fyrirtækið þjónustar sjávarútvegsfyrirtæki, verktaka sem og einstaklinga með allt milli himins og jarðar. Fjölbreytni verkefna hefur verið með ólíkindum í gegnum árin. Má þar nefna loftræsikerfi, einangrun og klæðningar á hita- og frystilögnum, flasningar, rústfrí smíði, álsmíði, lagning koparþaka, smíði á handriðum ásamt smíði á allra handa færiböndum og körum fyrir sjávarútveginn.

Þjónusta við einstaklinga hér í Eyjum er líka stór þáttur í starfsemi fyrirtækisins. „,Við hjá Eyjablikk höfum kappkostað við að sinna þeim verkum sem okkur hefur verið treyst fyrir af kostgæfni og með bros á vör, því að það skilar sér í ánægðum viðskiptavinum sem leita aftur og aftur til okkar með sínar þarfir,“ segir Stefán Lúðvíksson, eigandi.

Til dæmis framleiðir Eyjablikk flokkunarílát fyrir fyrirtæki og stofnanir. „Auðvitað henta þær líka fyrir heimili, tunnurnar koma í mörgun útfærslum og litum og eru einstaklega fallegar. Hægt er að fá þær með merkingum sem henta hverjum og einum.” segir Stefán að endingu.