Kjördæmisþing Sjálfstæðisflokksins verður haldið á Selfossi nk. sunnudag. Á þinginu verður valið á framboðslista flokksins fyrir komandi alþingiskosningar. Framundan er snörp kosningabarátta.

Þingmál í þágu Suðurkjördæmis

Á Alþingi hef ég lagt fram frumvörp, þingsályktanir og fyrirspurnir sem snerta kjördæmið og vil greina hér frá í stuttu máli.  Í Vestmannaeyjum vil ég nefna raforkumál, vatnsveitu og kostnað við húshitun auk þess að minnast þess sérstaklega að á árinu 2027 verða 400 ár liðin frá Tyrkjaráninu. Á sviði landbúnaðarmála hef ég lagt áherslu á aðgerðir til stuðnings landbúnaði, ættliðaskiptum og nýliðun, niðurfellingu erfðafjárskatts af bújörðum, áburðarforða, matvælaöryggi, nauðsyn varnaraðgerða þegar kemur að innflutningi á hráu kjöti og sölu lambakjöts til Mið-Austurlanda. Þá hefi ég lagt áherslu á skynsamlegt mat á áhrifum kolefnisgjalds í dreifbýli og hóflegt kílómetragjald.

Í Hornafirði hef ég stutt heilshugar samgöngubætur og lagt áherslu á góð samskipti hluteigandi og Vegagerðarinnar. Í Skaftárhreppi vil ég nefna aðgerðir til verndar lindarvatni í Landbroti og Meðallandi, samskipti landeigenda við Landgræðsluna, að ríkisjarðir verði seldar ábúendum og endurgerð friðaðra húsa. Í Grindavík hef ég beitt mér fyrir aðkomu vátryggingarfélaga að tjóni á íbúðar- og atvinnuhúsnæði í Grindavík. Í Reykjanesbæ hef ég beitt mér fyrir rannsóknum á áhrifum mengunar í gömlum vatnsbólum í Keflavík og Njarðvík á heilsufar, fækkun hælisleitenda, uppbyggingu Landhelgisgæslunnar við höfnina í Njarðvík. Þá hef ég lagt áherslu á örugg landamæri á Keflavikurflugvelli, uppbyggingu rafkerfis og raforkuöryggi á Suðurnesjum, framkvæmdir í Helguvík og lóðarleigu ríkisins. Í Suðurnesjabæ, hef ég beitt mér fyrir mati á áhrifum á innviði vegna fjölda hælisleitenda. Þegar kemur að Árborg hef ég stutt heilshugar við nýja og glæsilega Ölfusárbrú án breytinga og legg áherslu á að fjármagn verði tryggt fyrir kosningar svo framkvæmdir geti hafist strax.

Mér er umhugað um málefni eldri borgara og er tengiliður þingflokks við hagsmunafélög eldri sjálfstæðismanna. Ég hef lagt áherslu á stuðning við Þjóðkirkjuna, sem nýtur sérstakrar verndar í stjórnarskrá, og kristna kirkju sem hornstein trúar- og menningarlífs í landinu.

Útlendingmál snerta framtíð þjóðarinnar

Að lokum vil ég nefna þann málaflokk sem snertir okkur öll til framtíðar og mun verða eitt að stóru málunum fyrir kosningar en það eru útlendingamálin. Ég hef leitast við að sérhæfa mig í þessum málaflokki og hef m.a. setið sl. þrjú ár í flóttamannanefnd Evrópuráðsins. Auk þess starfaði ég fyrir Sameinuðu Þjóðirnar í Miðausturlöndum, áður en ég tók sæti á Alþingi. Ég vil leggja mitt að mörkum við að móta hér stefnu til framtíðar sem tekur tillit til íslenskra hagsmuna, þar á meðal fámennis þjóðarinnar og að standa ber vörð um okkar velferðarkerfi, sem því miður er orðið söluvara í sumum löndum.

Það hefur verið heiður að fá að starfa með dómsmálaráðherra og oddvita Suðurkjördæmis, Guðrúnu Hafsteinsdóttur að þessum málaflokki. Ég leyfi mér vona að ég fái áfram tækifæri til þess.

Nýsamþykkt útlendingalög hafa skilað okkur miklum árangri en það er enn verk að vinna og málaflokkurinn er síbreytilegur. Það varðar framtíð okkar sem þjóðar að hér sé traust og öruggt regluverk í útlendingamálum.

Óska eftir stuðningi í 3. sæti

Ég leita eftir stuðningi sjálfstæðismanna í Suðurkjördæmi til að skipa 3. sæti framboðslistans. Leggjumst öll saman á árar og tryggjum Sjálfstæðisflokknum góða kosningu 30. nóvember, fyrir framfarir og farsæld, í þágu íslenskrar þjóðar.

Birgir Þórarinsson