Á morgun, sunnudaginn 1. nóvember verður sunnudagaskóli í Landakirkju kl. 11.00. Engin messa verður kl. 13.00, en um kvöldið, kl. 20.00, verður allraheilagramessa þar sem látinna ástvina og samferðafólks verður minnst í þakklæti.

Í tilkynningu frá Landakirkju kemur fram að sérstaklega verði minnst þeirra sem látist hafa hér í Eyjum og/eða verið jarðsett í kirkjugarði Vestmannaeyja síðastliðna tólf mánuði. Nöfn þeirra verða lesin upp og kveikt á kerti fyrir hvern og einn.

„Í allraheilagramessu minnumst við í þakklæti látinna ástvina og samferðafólks og kveikjum á kertum til að minnast þeirra sem voru ljós á vegi okkar í gegnum lífið,“ segir í tilkynningunni.

Allir eru velkomnir og eru aðstandendur þeirra sem látist hafa síðastliðna tólf mánuði sérstaklega boðnir velkomnir.

Kór Landakirkju syngur undir stjórn Kitty Kovács.