Magnús Dagur Jónatansson er genginn til liðs við ÍBV í handbolta og mun leika með liðinu í Olís deild karla í vetur. Hann gerir tveggja ára samning. Handknattleiksdeild ÍBV greindi frá á samfélagsmiðlum sínum.

“Magnús Dagur er tvítugur og bráðefnilegur miðjumaður. Hann kemur til liðs við ÍBV frá uppeldisfélagi sínu, KA. Magnús Dagur hefur leikið með öllum yngri landsliðum Íslands. Nú síðast lék hann á EM í Rúmeníu í sumar með U20 ára landsliði Íslands,” segir í tilkynningu handknattleiksdeildar.

Handknattleiksdeild ÍBV kveðst afar ánægð með að fá Magnús Dag til liðs við ÍBV og hlakki til samstarfsins.