Milena Mihaela Patru, leikmaður ÍBV, lék með íslenska u-17 ára landsliðinu í fótbolta á æfingamóti í Portúgal á dögunum. Milena kom við sögu í öllum þremur leikjum Íslands á mótinu gegn Wales, Portúgal og Danmörku. 

Í fyrsta leiknum, gegn Wales, kom hún inn á undir lok leiks og lék síðustu 20 mínúturnar í 2–2 jafntefli. Í næsta leik mætti Ísland heimakonum í Portúgal. Milena kom inn á í hálfleik í þeim leik, sem Portúgal vann naumlega, 1–0.

Milena var síðan í byrjunarliði Íslands í lokaleiknum gegn Danmörku. Þar lét hún verulega til sín taka þegar hún stakk varnarmann Dana af og náði boltanum á undan markverðinum. Markvörðurinn felldi Milenu og íslenska liðið fékk vítaspyrnu í kjölfarið. Leiknum lauk með 1-2 sigri Danmerkur.

Hefur þegar skoraði 12 mörk í meistaraflokki

Milena, sem er aðeins 15 ára gömul, hefur farið vel af stað með ÍBV á þessu tímabili. Hún hefur skorað mikið fyrir 3. flokk félagsins og hefur jafnframt fengið tækifæri með meistaraflokki.

Á dögunum skoraði hún sitt fyrsta mark í Bestu deild kvenna þegar ÍBV mætti Þrótti Reykjavík. Þrátt fyrir ungan aldur hefur Milena nú skorað alls 12 mörk fyrir meistaraflokk ÍBV.