Bæjarstjórn ræddi stöðuna í samgöngumálum milli lands og Eyja. Lögð var fram sameiginleg bókun bæjarstjórnar:

“Bæjarstjórn Vestmannaeyja lýsir miklum vonbrigðum með núverandi stöðu samgangna við Eyjar. Öllum er ljóst að Herjólfur III hentar ekki vel til siglinga í Landeyjahöfn en þrátt fyrir það útvegaði Vegagerðin skipið til afleysinga fyrir nýja Herjólf. Á sama tíma er ekkert flug til Vestmannaeyja og sú staða hefur komið upp að engar samgöngur voru í boði við Vestmannaeyjar. Slíkt er óásættanlegt.

Þessum áhyggjum hefur ítrekað verið komið á framfæri við innviðaráðherra síðastliðna mánuði, en þrátt fyrir það hefur ekkert orðið af flugi til Vestmannaeyja, en vonir voru sérstaklega bundnar við sértæka aðgerð m.a. á meðan nýi Herjólfur væri í slipp.

Bæjarstjórn ítrekar enn og aftur þá kröfu að ríkið styðji við að koma áætlunarflugi aftur á laggirnar til Vestmannaeyja. Það er óforsvaranlegt að 4500 íbúa samfélag búi við jafnskertar samgöngur og raun ber vitni. Í raun hafa hagstæð veðurskilyrði undanfarnar vikur komið í veg fyrir ófremdarástand.”