Eyjakonan, Díana Dögg Magnúsdóttir og Andrea Jacobsen, tilvonandi leikmaður ÍBV, urðu deildarmeistarar með Blomberg-Lippe, í þýsku úrvalsdeildinni í handbolta í dag.

Þær tryggðu sér efsta sætið í þýsku úrvalsdeildinni með tveggja marka sigri, 33-31, á Borussia Dortmund. Fyrir leikinn var Dortmund á toppnum með 35 stig og Blomberg-Lippe með 34 stig í öðru sæti en með sigrinum komst Blomberg upp fyrir Dortmund og vann deildina með 36 stig.

Díana Dögg skoraði sex mörk í leiknum og innsiglaði sigur Blomberg-Lippe með lokamarki leiksins. Andrea Jacobsen gaf þrjár stoðsendingar.

Nú þegar deildinni er lokið, hefst úrslitakeppnin. Auk Blomberg-Lippe hafa Dortmund, Flames og Thuringer HC tryggt sæti sitt í úrslitakeppninni. Liðin í 5.-11. sæti fara í umspil um sæti í úrslitakeppninni.