Félagið Kraftur, sem styður ungt fólk sem greinst hefur með krabbamein og aðstandendur þeirra, stóð fyrir vel heppnuðum viðburði í Höllinni í Vestmannaeyjum í dag. Viðburðurinn er hluti af árlegri fjáröflunar- og vitundarvakningu félagsins. Að þessu sinni var perlað nýtt „Lífið er núna“ armband, sem margir þekkja sem tákn um styrk, von og samstöðu.

Markmið dagsins var að vekja athygli á mikilvægu starfi Krafts og safna fé til að styðja við ungt fólk sem hefur greinst með krabbamein, sem og fjölskyldur þeirra og aðstandendur. Fjölmargir lögðu leið sína í Höllina, til að perla og sýndu málefninu þannig hlýhug í verki.

Stemningin var notaleg og samstaðan áþreifanleg þar sem gestir á öllum aldri settust niður, perludu armbönd og lögðu sitt af mörkum til góðs málefnis. Myndasyrpu frá viðburðinum má sjá hér að neðan.