Alls hafa 4.566 pysjur verið skráðar í Vestmannaeyjum það sem af er pysjutímabilinu, samkvæmt nýjustu tölum á lundi.is. Af þeim hafa 1.095 pysjur verið vigtaðar og er meðalþyngdin 303 grömm. Sú þyngsta hefur vegið 650 grömm en sú léttasta 200 grömm.

Tölurnar eru athyglisverðar í samanburði við síðasta ár. Þá voru alls 3.283 pysjur skráðar og 1.045 þeirra vigtaðar. Meðalþyngdin var 243 grömm og er hún því 60 grömmum meiri í ár. Meðalþyngd pysjanna í ár er einnig talsvert yfir meðaltali allra ára frá upphafi Pysjueftirlitsins, sem er 264,5 grömm.

Pysjutímabilið í fyrra var það lengsta frá því Pysjueftirlitið hóf starfsemi. Fyrsta pysjan fannst 29. júlí og sú síðasta 2. október og stóð tímabilið því yfir í rúmar níu vikur. Að jafnaði hefur pysjutímabilið staðið í 38 daga þau 23 ár sem eftirlitið hefur verið starfrækt.

Fáar og léttar pysjur ásamt löngu pysjutímabili í fyrra þóttu benda til þess að skortur hefði verið á góðu æti. Staðan nú er önnur, enda eru pysjurnar bæði fleiri og talsvert þyngri. Skráning pysjubjörgunarmanna veitir mikilvægar upplýsingar um fjölda pysja og ástand þeirra. Pysjuleitendur eru því hvattir til að skrá allar pysjur sem finnast á lundi.is.