Brynjar Ólafsson, sviðsstjóri umhverfis- og framkvæmdasviðs Vestmannaeyjabæjar fór yfir stöðu framkvæmda í íþróttamiðstöð Vestmannaeyja á fundi framkvæmda- og hafnarráðs í liðinni viku. Nokkur verkefni eru komin á lokastig en önnur eru enn í vinnslu.

Meðal þess sem unnið hefur verið að eru breytingar á kaffistofu starfsmanna, afgreiðslu og skrifstofuaðstöðu. Kaffistofa og afgreiðsla eru nú á loka metrunum og aðeins eftir að ljúka rafmagnsfrágangi. Þá er breytingum á skrifstofum og aðstöðu íþróttakennara lokið.

Einnig stendur yfir endurnýjun á hreinsikerfi sundlaugarinnar. Uppsetning og tengingar á sandsíum ganga vel og er nú unnið að lagningu leiðslna til og frá síunum, áfram að dælubúnaði. Samhliða því er smíði nýrrar rafmagnstöflu á góðri leið, en hún mun hýsa stjórnbúnað, tengingar við dælur og tilheyrandi skynjara.

Framkvæmda- og hafnarráð þakkaði sviðsstjóra fyrir yfirferðina en benti jafnframt á að framkvæmdirnar hefðu dregist meira en upphaflega var gert ráð fyrir. Tafirnar séu meðal annars raktar til atriða sem komu upp á meðan á verkinu stóð. Að mati ráðsins undirstrikar reynslan mikilvægi þess að undirbúningur og verkáætlanir séu eins ítarlegar og kostur er áður en ráðist er í sambærileg verkefni.