Innviðaráðuneytið hefur samþykkt beiðni Vestmannaeyjabæjar um að framlengja ríkisstyrkt áætlunarflug til Vestmannaeyja fram til mánaðarmóta. Frá þessu er greint á vefsíðu Vestmannaeyjabæjar.

Í framhaldinu mun Vegagerðin hafa samband við flugfélagið Norlandair um áframhaldandi flug samkvæmt óbreyttu fyrirkomulagi, en gert er ráð fyrir tveimur ferðum á dag áfram.

Ástæða framlengingarinnar er sú að Landeyjahöfn hefur enn ekki opnað fyrir fulla ferjuáætlun og því talið nauðsynlegt að halda fluginu áfram um sinn. Í frétt Vestmannaeyjabæjar kemur fram að með ákvörðuninni verði áfram tryggður aðgangur íbúa, fyrirtækja og annarra að öruggu og reglubundnu flugi til og frá Eyjum.