​Nýverið birtust niðurstöður úr nýjum Þjóðarpúlsi Gallup og eru helstu breytingar milli mælinga að fylgi Samfylkingarinnar eykst um nær þrjú prósentustig og fylgi Sjálfstæðisflokksins minnkar um næstum tvö prósentustig. Fylgi annarra flokka breytist lítið eða á bilinu 0,2-0,8 prósentustig og eru breytingarnar ekki tölfræðilega marktækar fyrir utan lækkun hjá Sósíalistaflokki. 

Tæplega 35% kysu Samfylkinguna ef kosið yrði til Alþingis í dag og er það sama hlutfall og Samfylkingin hefur mest mælst með í Þjóðarpúlsi Gallup, í febrúar 2008. Nær 19% kysu Sjálfstæðisflokkinn, hátt í 15% Viðreisn, tæplega 11% Miðflokkinn og næstum 7% Flokk fólksins. Nær 5% kysu Framsóknarflokkinn en fylgi hans hefur ekki mælst lægra síðan mælingar Gallup hófust í júní 1992. Tæplega 4% kysu Pírata, ríflega 3% Vinstri græn, rösklega 2% Sósíalistaflokk Íslands og tæplega 1% aðra flokka. Liðlega 7% myndu skila auðu eða ekki kjósa og rúmlega 12% taka ekki afstöðu eða vilja ekki gefa hana upp. Rúmlega 65% þeirra sem taka afstöðu styðja ríkisstjórnina, sem er rösklega tveim prósentustigum meira en í síðasta mánuði.