Það er yndislegt að búa í Vestmannaeyjum og ég myndi hvergi annars staðar vilja búa. Ég veit að margt gott hefur verið gert varðandi samgöngur milli lands og eyja, en tel mikilvægt að aðrir fái smá innsýn í það sem við búum við.

Eins og margir vita hefur ekki verið hægt að halda uppi siglingaráætlun Herjólfs til Landeyjahafnar, þar sem dýpkunarskipið Álfsnes nær ekki að dýpka vegna ölduhæðar. Af þeirri ástæðu hefur verið ríkisstyrkt flug til eyja á þessu tímabili (ekki á þriðjudögum og miðvikudögum), og oft aðeins framlengt um tvær vikur í senn.

Ég ætla að taka fyrir ykkur dæmi.

Áætlunarflug til Vestmannaeyja hætti í gær samkvæmt samningi Innviðaráðuneytisins við Nordlandair, og hefur hann ekki verið framlengdur. Eldri sonur minn á að mæta í aðgerð á morgun. Við þurfum því að panta með Herjólfi til Þorlákshafnar og gista eina nótt í Reykjavík. Þessi bátsferð mun taka fjórar klukkustundir hvora leið vegna bilunar í Herjólfi sem kom upp síðustu helgi.

Ef það væri flug frá Eyjum alla daga vikunnar myndi það taka hann um 20 mínútur að fara til Reykjavíkur. Foreldrar mínir, sem eru búsettir í Eyjum en staddir í Reykjavík, gætu þá fylgt honum í aðgerð og keyrt hann aftur í flug sama dag. Þetta væri mun þægilegra ferðalag fyrir hann eftir aðgerð.

Nú erum við að fara að ferma yngri peyjann okkar næstu helgi. Við vitum ekki hversu margir gestir munu mæta, þar sem það veltur allt á því hvort siglt verður um Landeyjahöfn. Skiljanlega treysta gestir sér ekki í siglingu frá Þorlákshöfn.

Á hverjum degi – og stundum oft á dag – förum við (eins og meirihluti Eyjamanna) inn á Marinetraffic til að athuga hvar Álfsnesið er statt. Það var fyrir vestan, en í síðustu viku sigldi það til Kópavogshafnar. Eyjamenn eru líka mjög duglegir að fylgjast með veðurspám á vedur.is (og öðrum veðursíðum) til að kanna ölduhæð, öldulengd og hvort sé stórstreymi.

Loksins, síðastliðinn laugardag, öllum til mikillar gleði, lagði Álfsnesið af stað frá Kópavogi. Hins vegar fór það ekki til Landeyjahafnar heldur til Þorlákshafnar. Nú er það í Landeyjahöfn að reyna að moka, en það gengur víst erfiðlega þar sem dýpið er svo lítið.

Ég veit að það geta alltaf komið upp bilanir og ekkert við því að gera. Álfsnesið, sem fengið var til að dýpka í Landeyjahöfn, ræður einfaldlega ekki við þær erfiðu aðstæður sem þar eru. Sem betur fer er von á öflugra dýpkunarskipi í haust, en það er of langt í það miðað við stöðuna í dag.

Núna er beðið eftir sérfræðingi frá Noregi til að meta bilunina í Herjólfi. Kannski þarf Herjólfur að fara í slipp – og hvað gerist þá?

Nokkrar vangaveltur:
➡️ Hefði átt að fá öflugra skip, jafnvel til skemmri tíma, sem gæti dýpkað höfnina í Landeyjum hraðar og við erfiðari skilyrði en Álfsnes ræður við?
➡️ Hefði Innviðaráðuneytið átt að gera lengri samning við Nordlandair, þar sem ljóst er að aðstæður í Landeyjahöfn eru ekki nægilega góðar fyrir reglulegar siglingar? Í gær hætti flug til eyja og við vitum ekki hvort það verður tekið upp aftur. Það þarf meiri fyrirsjáanleika í flugsamgöngum til Vestmannaeyja og að bjóða upp á flug alla daga, allt árið um kring.
➡️ Væri hægt að bæta upplýsingaflæði til íbúa varðandi samgöngur til og frá Vestmannaeyjum?

Þessi póstur var sendur á Innviðaráðuneytið og forsætisráðherra.

Mikið ofboðslega hlakka ég til þegar jarðgöngin milli Vestmannaeyja og fasta landsins verða opnuð.

Þórunn Pálsdóttir hjúkrunarfræðingur og ljósmóðir búsett í Vestmannaeyjum.