Fjölskyldu- og tómstundaráð Vestmannaeyja hefur samþykkt að segja upp samningi við Endurvinnsluna hf. frá og með 1. febrúar næstkomandi. Ákvörðunin er liður í endurskipulagningu á starfsemi Heimaeyjar vinnu- og hæfingarstöðvar.

Fram kemur í fundargerð ráðsins að stefnt sé að því að efla Heimaey sem virkni- og hæfingarstöð, með aukinni áherslu á virkni og hæfingu þjónustuþega. Horft verði til starfsemi sambærilegra stöðva hjá öðrum sveitarfélögum.

Ráðið tekur fram að breytingin feli ekki í sér skerðingu á þjónustu Heimaeyjar. Um sé að ræða breytingar á áherslum og fyrirkomulagi þjónustunnar, með það að markmiði að mæta betur ólíkum þörfum þeirra sem þar njóta þjónustu.

Endurbætur fyrirhugaðar á húsnæðinu

Jafnframt eru fyrirhugaðar endurbætur á húsnæði Heimaeyjar til að bæta aðstöðuna og laga hana betur að starfseminni.

Áður en ráðist verður í framkvæmdirnar verður skoðað hvernig nýta megi rýmið sem Endurvinnslan hefur nú til umráða. Við það verði meðal annars tekið mið af framtíðarþörfum starfseminnar og fjölgun þeirra einstaklinga sem þurfa á virkni og hæfingu að halda.

Markmið breytinganna er, að sögn ráðsins, að styrkja starfsemi Heimaeyjar og tryggja að húsnæði og aðstaða geti betur mætt þörfum þjónustuþega til framtíðar.