Nemendur í 10. bekk Grunnskóla Vestmannaeyja hefja á mánudaginn næstkomandi gangbrautavörslu við nokkrar fjölfarnar gangbrautir í Vestmannaeyjum. Verkefnið miðar að því að auka öryggi yngri nemenda á leið sinni í skólann og hvetja elstu nemendur til að taka þátt í samfélagsmálum á ábyrgan og jákvæðan hátt.

Í tilkynningu frá Grunnskóla Vestmannaeyja og Landsbankanum segir að þetta sé í áttunda sinn sem nemendur 10. bekkjar taki þátt í verkefninu, sem mun standa út febrúar 2026. Lögreglan í Vestmannaeyjum verður áfram með reglubundið eftirlit við skólana og til taks ef þörf krefur.

„Gangbrautirnar sem nemendur vakta eru á Skólavegi, Kirkjuvegi við Vallargötu og við Hraunbúðir. Gangbrautaverðirnir verða vel sýnilegir í gulum vestum og munu leggja sig fram við að aðstoða yngri nemendur í umferðinni.

Líkt og áður styður Landsbankinn verkefnið með veglegum styrk í ferðasjóð 10. bekkja í GRV og útvegar jafnframt vesti fyrir gangbrautaverðina. Með þessu framlagi vill Landsbankinn leggja sitt af mörkum til að efla öryggi barna og unglinga í umferðinni í Vestmannaeyjum.

Við í Grunnskóla Vestmannaeyja þökkum Jóni Óskari Þórhallssyni, útibússtjóra Landsbankans í Vestmannaeyjum, kærlega fyrir gott og farsælt samstarf,” segir jafnframt í tilkynningunni.