Umhverfis- og skipulagsráð Vestmannaeyja hefur samþykkt fyrir sitt leyti uppfærða deiliskipulagstillögu vegna uppbyggingar við Strandveg 44 og lagt til að bæjarstjórn staðfesti hana.

Málið var afgreitt á fundi ráðsins 12. október. Eyjafréttir fjölluðu í ágúst um breytingar sem ráðið hafði óskað eftir í kjölfar athugasemda við áformin. Þær fólu meðal annars í sér færri íbúðir, minna byggingarmagn og aukna fjarlægð frá fjölbýlishúsinu við Tangagötu 10.

Lóðarhafi hefur nú lagt fram uppfærð gögn sem ráðið telur samræmast þeim breytingum sem kallað var eftir.

Í bókun ráðsins segir að brugðist hafi verið við athugasemdum eins og kostur sé. Tillagan, með þeim breytingum sem gerðar hafi verið, feli í sér málefnalegt jafnvægi milli sjónarmiða og hagsmuna sem fram hafi komið í skipulagsferlinu.

Áformin gera áfram ráð fyrir fjögurra hæða húsi með bílakjallara, verslun og þjónustu á jarðhæð og íbúðum á efri hæðum.

Þessu tengt:

Færri íbúðir og minna byggingarmagn við Strandveg 44

Umhverfis- og skipulagsráð Vestmannaeyja leggur til að heimiluðum íbúðum í fyrirhugaðri nýbyggingu við Strandveg 44 verði fækkað úr 12–14 í 8–12. Jafnframt verði dregið úr byggingarmagni og byggingarreiturinn færður fjær fjölbýlishúsinu við Tangagötu 10. Tillaga að breyttu deiliskipulagi vegna uppbyggingar við Strandveg 44 var auglýst í annað sinn frá 15. desember 2025 til 4. febrúar […]