Myndlistarmaðurinn Sigurður Sævar Magnússon opnar einkasýningu í Magnahúsinu við Strandveg 76 í Vestmannaeyjum í dag, fimmtudag, kl. 17. Á sýningunni verða ný olíu- og vatnslitaverk sem listamaðurinn hefur málað á þessu ári og sækja innblástur til Vestmannaeyja.

Fyrsta einkasýning ársins

Sigurður Sævar útskrifaðist frá Konunglegu listaakademíunni í Haag sumarið 2023 og hefur frá útskrift starfað og haldið sýningar bæði á Íslandi og í Hollandi. Hann var meðal annars valinn til þátttöku í Best of Graduates 2023 hjá hinu virta Ron Mandos-galleríi í Amsterdam.

Í desember síðastliðnum stóð hann að tveimur stórum einkasýningum samtímis, annarri í gamla Landsbankahúsinu við Austurstræti og hinni á heimili hollenskra listasafnara í Wassenaar í Hollandi. Sýningin í Magnahúsinu verður fyrsta einkasýning hans á þessu ári.

Góðar minningar frá Eyjum

„Þegar ég fór að huga að næstu einkasýningu áttaði ég mig á því að ég hafði aðeins haldið einkasýningar á höfuðborgarsvæðinu og erlendis. Ég hafði aldrei haldið sýningu á landsbyggðinni og fannst ég þurfa að breyta því. Þá komu Vestmannaeyjar strax upp í hugann. Ég á góðar minningar frá Eyjum, en ég kom þangað nokkrum sinnum sem strákur til að taka þátt í sundmótum,“ segir Sigurður Sævar.

„Mér er minnisstætt þegar ég gekk um bæinn með vini mínum í vorsólinni eftir góða sigra í sundlauginni og lýsti því yfir að ég gæti hugsað mér að verða gamall maður í Eyjum,“ segir hann.

Nú, mörgum árum síðar, snýr Sigurður Sævar aftur til Vestmannaeyja – að þessu sinni ekki sem sundkappi heldur listamaður með pensla og listaverk í farteskinu. Verkin á sýningunni sækja öll innblástur til Eyjanna.