Undirbúningur að styttingu Hörgaeyrargarðs hefur færst áfram með ákvörðun HMS og leyfi Umhverfis- og orkustofnunar. Samkvæmt fundargerð framkvæmda- og hafnarráðs Vestmannaeyja er nú hægt að hefja dýpkun innsiglingarrennunnar. Enn á eftir að sækja um framkvæmdaleyfi.

Málið var tekið fyrir á fundi ráðsins 30. september. Þar kemur fram að fyrirhugað sé að sanddæluskipið Sebastiano Caboto dýpki innsiglingarrennuna og að stytting garðsins verði boðin út í framhaldinu.

Markmið framkvæmdarinnar er að breikka innsiglingarrennuna og auka þannig siglingaöryggi í Vestmannaeyjahöfn.

Leyfi fyrir allt að 120.000 rúmmetrum

Umhverfis- og orkustofnun veitti 17. september leyfi til að varpa allt að 120.000 rúmmetrum af dýpkunarefni og efni úr garðinum í hafið. Leyfið gildir til 17. september 2030.

Losunarsvæðið er innan hafnarsvæðis Vestmannaeyja, norðan við Eiðið, í garðstæði fyrirhugaðs hafnargarðs. Á yfirlitsteikningu Vegagerðarinnar er dýpkunarsvæðið merkt um 30.000 fermetrar og losunarsvæðið um 15.000 fermetrar.

Í leyfinu kemur fram að áætlaður verktími sé á árunum 2026–2028. Gert sé ráð fyrir dýpkunarpramma við dýpkun og við að fjarlægja garðinn, auk þess sem dýpkunarskip verði notað við hluta framkvæmdarinnar.

Ekki háð mati á umhverfisáhrifum

Samkvæmt leyfisbréfinu ákvað HMS 18. ágúst að framkvæmdin væri ekki líkleg til að hafa umtalsverð umhverfisáhrif og væri því ekki háð mati á umhverfisáhrifum. Hafrannsóknastofnun gerði ekki sérstakar athugasemdir við fyrirhugað varp efnisins í hafið.

Leyfið er meðal annars bundið skilyrðum um að takmarka gruggmyndun, tilkynna upphaf og lok dýpkunar- og efnislosunarlotu og halda skrá yfir magn og staðsetningu efnis sem losað er.

Framkvæmda- og hafnarráð fagnar því að tilskilin leyfi liggi fyrir að undanskildu framkvæmdaleyfi, sem hafnarstjóri á eftir að sækja um. Ráðið leggur áherslu á að hafa hraðar hendur svo framkvæmdir við styttingu garðsins geti hafist sem allra fyrst.