Ávarp nýstúdents – Jón Grétar Jónasson á þjóðhátíðardaginn:
Góðan dag kæru gestir. Ég er hér kominn hér fyrir hönd nýstúdenta Framhaldsskólans í Vestmannaeyjum til að flytja útskriftarræðuna. Þann 25. maí síðastliðinn rann upp sá dagur sem við höfum beðið spennt eftir, enda lagt á okkur mikla vinnu til að ná þessum áfanga. Það er því tilefni til að fagna og njóta áfangans með okkar fjölskyldum og vinum. Það koma upp margar tilfinningar þegar maður hugsar til þess að þetta sé okkar endastöð sem samnemendur í FÍV. Maður fyllist gleði og stolti yfir því að hafa náð þessum áfanga en einnig söknuði og örlítilli depurð að þurfa kveðja. Mörg okkar hafa gengið saman í gegnum 13 ára skólagöngu, eða alveg frá sex ára aldri og hingað til dagsins í dag. Við nemendur í árgangi 2005 fengum meðal annars að kynnast Margréti Rut kennara okkar í unglingadeild GRV sem síðan fylgdi okkur hingað í FÍV. Það hljóta að teljast vera góð meðmæli fyrir þann árgang.
Á þessum árum í FÍV höfum við þroskast saman og lært heilmikið á nám og lífið. Í dag er komið að ákveðnum tímamótum þar sem við förum öll í sitthvora áttina og eltum okkar drauma. Fuglinn er floginn og vegir liggja til allra átta. Það verður áhugavert að fylgjast með hvert leiðir okkar liggja. Sum okkar munu fara strax í framhaldsnám á meðan aðrir ætla kannski að hinkra aðeins og finna hvaða menntaveg þeir vilji feta, einhver okkar fara eflaust rakleiðis á vinnumarkaðinn. Svona fyrir okkur yngstu er stærsta fjallið jú óklifrað, og það er húsnæðismarkaðurinn. En svoleiðis áhyggjur skal spara fyrir annan dag en þennan.
En hvert sem lífið leiðir okkur þá vitum við að allir okkar vegir eru færir með rétta hugarfarinu, dugnaði og viskunni sem við höfum lært hér innan veggja þessa skóla. Veganesti sem enginn tekur frá okkur. Fyrir FÍV verðum við ævinlega þakklát en í skólanum er gott að vera. Maður finnur fyrir jákvæða andrúmsloftinu, þolinmæðinni, áhuganum og metnaðinum sem kennarar okkar og starfsfólk skólans búa yfir. Ég og samnemendur mínir viljum þakka kennurunum okkar fyrir kennsluna, þolinmæðina, sanngirnina og heiðarleikann. Auk þess þökkum við foreldrum og vinum okkar fyrir að hafa staðið við hlið okkar og stutt vel við bakið okkar.
Ég vil sérstaklega þakka Wikipedia, Britannica, Chat GPT og Quillbot fyrir alla dásamlegu aðstoðina. Að lokum ætla ég að vitna í nokkur orð frá mínum manni David Bowie, „Morgundagurinn tilheyrir þeim sem geta heyrt hann koma.“ Enn og aftur ég heiti Jón Grétar Jónasson, takk kærlega fyrir mig og njótið dagsins.
