Hressilegur og fjölsóttur var fundurinn sem Morgunblaðið stóð fyrir í Höllinni í Vestmannaeyjum í gær. Fundinum var stýrt af blaðamönnum Morgunblaðsins, Andrési Magnússyni og Stefáni Einari Stefánssyni, sem stóðu sig með miklum ágætum.

Á palli voru Arndís María Kjartansdóttir, oddviti og bæjarstjóraefni Eyjalistans, Sæunn Magnúsdóttir, bæjarstjóraefni Miðflokksins, og Eyþór Harðarson. Arndís og Sæunn koma nýjar inn í forystusætin en Eyþór er að ljúka sínu öðru kjörtímabili sem bæjarfulltrúi.

Fundargestir voru um 200 talsins, sem telst gott á pólitískum fundi, og þar fengu íbúar tækifæri til að kynnast framboðunum af fyrstu hendi. Oddvitar og bæjarstjóraefni þriggja framboða stigu á svið, kynntu sig, fóru yfir helstu áherslumál og gerðu grein fyrir stefnu sinni.

Umræður voru fjörugar og helstu málin voru samgöngur, atvinnumál, skipulag og uppbygging innviða til að mæta fjölgun íbúa í Vestmannaeyjum. Þau voru sammála um flest, þó skiptar skoðanir væru um forgangsröðun.

Það sem vegur þyngst er ný vatnsleiðsla sem lögð verður í sumar og kostar um 3 milljarða. Ríkið leggur til 800 milljónir króna, sem þau eru sammála um að sé of lítið. Hér er um almannavarnamál að ræða og telja þau ósanngjarnt að rúmir 2 milljarðar lendi á herðum íbúa í Vestmannaeyjum.

Upptaka af fundinum er aðgengileg á vef Morgunblaðsins. Fleiri myndir frá fundinum má sjá hér að neðan.