Íslandsmethafinn í 3.000 m hlaupi innanhúss og eyjamaðurinn Hlynur Andrésson, keppti í hádeginu í dag í annað sinn á ferlinum á Evrópumeistaramóti innanhúss í Emirates Arena í Glasgow í Skotlandi.
Alls voru 38 hlauparar frá 21 landi skráðir til keppni í undanrásum hlaupsins. Hlynur hljóp í fyrri riðlinum af tveimur og hafnaði í 13. sæti af þeim 16 sem luku keppni. Hann kom í mark á 8:06,97 mínútum sem er næst besti tími Íslendings en Hlynur setti Íslandsmet í greininni í Bergen í Noregi á dögunum þegar hann hljóp vegalengdina á 7:59,11 mínútum. Sá tími hefði dugað honum í 11. sæti í riðlinum,
Hlynur er þar með úr leik en fjórir efstu úr hvorum riðli komast í úrslitin sem verða á morgun auk þeirra fjögurra sem ná besta tíma.