Stærsta útselslátur við suðurströnd landsins er nú í Surtsey. Þetta sýna reglubundnar talningar á selum við landið, og fjallað er um í nýrri ársskýrslu Náttúrufræðistofnunar og sagt er frá á vef fiskifrétta. Þar segir að árið 1983 varð þess vart að útselur væri tekinn að kæpa í eynni. Árið 2017 var áætlað að fjöldi útselskópa hafi verið á bilinu 130–140 yfir kæpingartímann, til viðbótar við fullorðin dýr.
Gróður og selur
Í þessu samhengi segir frá því að náið hefur verið fylgst með landnámi og framvindu gróðurs í Surtsey í gegnum árin. Mikil stakkaskipti urðu þar eftir að þétt máfavarp tók að myndast á suðurhluta eyjarinnar upp úr 1986. Svæðið tók að gróa upp vegna áburðaráhrifa frá máfunum og einnig báru þeir nýjar plöntutegundir til eyjarinnar. Lengi vel var þetta eina svæðið þar sem gróður þétti sig að ráði í Surtsey. En eftir 2010 tók að bera á því að gróður væri einnig tekinn að þéttast á norðurtanga eyjarinnar og kom það meðal annars vel fram á loftmyndum.
„Bárust böndin að útselnum og mögulegum áburðaráhrifum af honum í látrið og leikur vart vafi á því að selurinn hefur, líkt og svartbakurinn, haft áhrif á gróðurframvindu á tanganum með áburðarefnum sem frá honum koma“, segir í skýrslunni.
Mjög hefur gengið á Surtsey frá því hún myndaðist. Þegar gosi lauk árið 1967 var norðurtanginn um 30 ha að flatarmáli, tuttugu árum síðar um 20 ha og aðeins 10 ha árið 2018.
Þetta hefur líklega leitt til þess að selurinn hefur þétt sig í látrinu og áburðaráhrif á flatareiningu aukist. Á næstu árum er ætlunin að gæta betur að útselnum í Surtsey og rannsaka nánar hver áhrif hann hefur á gróðurframvindu á tanganum, segir í skýrslunni.
