Styrktarsjóður Landakirkju úthlutar fyrir hver jól til þeirra sem á því þurfa að halda. Séra Viðar Stefánsson sóknarprestur segir það ekki komið á hreint hversu margir það verða núna í ár sem fá úthlutað úr sjóðnum. „Þeim fækkar alla vegna ekki. Síðustu mánuðir hafa verið strembnir í þessum efnum og við höfum séð aukna þörf sérstaklega núna á haustmánuðum. Það er ljóst að desember, þrátt fyrir mikil ljós, gleði, fögnuð og hátíð, verður erfiður fyrir alltof marga. Í fyrra voru þetta hátt í 40 úthlutanir og nokkurt hlutfall þeirra var til barnafjölskyldna. Sem betur fer er þessi aðstoð til staðar því hún kemur sannarlega í góðar þarfir og skiptir miklu máli fyrir mjög marga. Hins vegar væri vissulega óskandi að það væri ekki þörf.“
Spyrja ekki um trúarafstöðu
Viðar segir jólin og aðventuna vera annasaman tíma í þessum efnum en úthlutað er úr sjóðnum allt árið um kring, bæði til einstaklinga og barnafjölskyldna. „Einnig höfum við veitt úr sjóðnum til að greiða fyrir ýmislegt sem er nauðsynlegt fyrir viðkomandi, eins og lyfjakaup o.fl.. Úthlutun úr sjóðnum fer alltaf í gegnum presta Landakirkju sem spyrja aldrei um trúarafstöðu eða trúfélagsaðild. Við komum til móts við þörfina en ekki trúfélag viðkomandi.“ Viðar segir upphæðirnar sem úthlutað er misháar. „Þetta er þó slík upphæð að það munar heilmiklu fyrir viðkomandi. Við njótum líka aðstoðar Hjálparstarfs kirkjunnar sem við úthlutum einnig með okkar úthlutun allt árið um kring en þó sérstaklega fyrir jól. Vissulega fer þó hlutfallslega meira til barnafjölskyldna heldur en einstaklinga.“
Íslendingar í miklum meirihluta
Viðar segir þá sem leita til sjóðsins vera á öllum aldri, jafnt einstæðinga sem og fjölskyldur með börn og fólk bæði af erlendum uppruna og Íslendinga. „Íslendingar eru í miklum meirihluta enda eru þeir e.t.v. meira meðvitaðir um tilvist styrksins. Hins vegar höfum við farið í smá samstarf við Klaudiu fjölmenningarfulltrúa núna í ár en hún hefur bent skjólstæðingum sínum á úthlutunina. Við eigum því eftir að sjá hvort það skili sér í auknum fjölda umsókna því þar er þörfin ekki síðri.“
Einn er einum of mikið
Er fátækt útbreiddari í Vestmannaeyjum en fólk heldur? „Í hugum þeirra sem glíma ekki við fátækt er fátækt mun algengari en þeir halda. Svo er alveg eins með þetta og margt annað sem betur má fara að einn er hreinlega einum of mikið. Fátækt er margþættur vandi og ljóst er að hún gengur oft í erfðir og einstaklingar þurfa oft að lyfta grettistaki til að komast úr viðjum fátæktar. Fátækt er einnig oft kerfislægur vandi þar sem einstaklingar lenda á milli í blessuðu kerfinu. Það er erfitt að uppfylla ýmsar kröfur þegar innistæðan er lítil sem engin. Hvort fátækt er algengari eða verri hér í Vestmannaeyjum er erfitt að svara en einn er að sjálfsögðu einum of mikið.“
Tár falla við úthlutun
Sjóðurinn er fjármagnaður af einstaklingum og fyrirtækjum hér í Eyjum. „Sumir gefa reglulega og aðrir ekki. Burtséð frá því er það fyrir tilstuðlan slíkrar gjafmildi sem við getum úthlutað úr sjóðnum. Hægt er að leita til okkar prestanna til að styrkja sjóðinn en einnig er hægt að styrkja hann með millifærslu:
Bnr. 0185-15-551107
Kt. 280374-4829
Við þökkum kærlega fyrir öll framlög sem lögð eru í sjóðinn. Margt smátt gerir eitt stórt og enn meira til þeirra sem þurfa. Hjá sumum falla tár við úthlutun, sérstaklega fyrir jól. Það er ágætt dæmi um það hversu miklu máli þessi sjóður og úthlutun skiptir. Sérstaklega á aðventu og jólum.
