„Dagarnir eru nokkuð reglu- og þægilegir fyrir utan auðvitað fótboltamótin, goslok og Þjóðhátíð. Þá dagana þurfum við extra athygli og viðhald,” segir Sreten Ævar Karimanovic, umsjónarmaður tjaldsvæða.
„Á Þjóðhátíð þurfum við sérstaklega að sinna Þórsvellinum þar sem Herjólfsdalur fer til ÍBV þá vikuna, og viljum við að gestum okkar líði sem allra best við dvölina. Við bætum við okkur starfskröftum, gæslu, gestir fá armbönd hjá okkur og fleira. Hátíðin er hápunktur tímabilsins en eftir það hægist á öllu.”
Þetta er annað árið sem að fyrirtækið Landamerki ehf. annast rekstur og umsjón tjaldsvæða og þjónustumannvirkja þeim tengdum í Herjólfsdal og við Þórsheimilið í Vestmannaeyjum.
Fyrirtækið sér um að veita alla almenna þjónustu á tjaldsvæðum bæjarins og annast jafnframt daglegan rekstur, s.s. starfsmannahald, kaup á þjónustu- og rekstrarvörum, sértækan resktur og létt viðhald. Landamerki ehf. sér einnig um önnur tjaldsvæði víðs vegar á landinu.
„Annars hefur sumarið gengið mjög vel. Við erum með góðan mannskap og vorum með það líka í fyrra” segir Sreten Ævar að endingu við Eyjafréttir.
