Stórmyndirnar tvær Barbie og Oppenheimer voru frumsýndar hér á landi fyrir helgi. Kvikmyndaparið þénaði 35,7 milljónir króna hérlendis á þremur dögum en alls nam miðasala tæpum 43 milljónum króna sl. helgi sem gerir hana að tekjuhæstu kvikmyndahelgi sögunnar hér á landi. Þetta kemur fram í tilkynningu frá Félagi rétthafa í sjónvarps- og kvikmyndariðnaði.
Það hefur verið mikil eftirvænting fyrir myndunum tveimur en gerð þeirra kostaði yfir 100 milljónir bandaríkjadala hver. Á samfélagsmiðlum hefur verið mikil áskorun að horfa á myndirnar samdægurs og er þá talað um fyrirbærið „Barbenheimer”.
Eyjamönnum gefst möguleiki að fara á myndirnar í röð nk. sunnudag en Barbie verður sýnd klukkan þrjú og Oppenheimer sama dag klukkan sjö.
Um 240 manns í bíó um helgina
„Um helgina komu 176 manns á Barbie á tveimur sýningum sem er ansi gott. Færri komu á Oppenheimer eða aðeins 35,” segir Ingveldur Theodórsdóttir, frá Leikfélagi Vestmanneyja, en félagið sér um rekstur Eyjabíós. Þá voru 30 manns sem fóru á Mission: Impossible – Dead Reckoning með Tom Cruise.
„Það að fá um 240 manns í bíó um helgina er ansi gott hér í Eyjum. En það má segja að ef fólk vill hafa þessa þjónustu í Eyjum þá verður það að mæta. Við reynum að gera okkar besta og vonum að fólk sé ánægt með það” segir Ingveldur.
Þeir kvikmyndahúsagestir sem mættu bleikklæddir á Barbie fengu frítt popp og sleikjó og var miðasalan skreytt hátt og lágt.
