Björgunarskipið Þór sinnti í dag sjúkraflutningum, bæði frá Vestmannaeyjum og til.
Klukkan 9 í morgun var áhöfn Þórs kölluð út til að flytja sjúkling frá Vestmannaeyjum. Sjúkrabíll flutti sjúkling að Þór og var hann kominn um borð í björgunarskipið klukkan 9:35 og lagt var af stað áleiðis í Landeyjahöfn fimm mínútum síðar. Siglingin í Landeyjahöfn var tíðindalaus, en Þór lagðist að bryggju þar rétt rúmlega tíu þar sem sjúkrabíll beið sjúklings. Þór hélt svo aftur til Eyja, en þörf var á öðrum flutningi skömmu síðar.
Rétt upp úr hádegi kom önnur beiðni, í þetta sinn að sækja sjúkling í Landeyjahöfn og flytja til Eyja. Þór fór úr höfn í Vestmannaeyjum klukkan hálf eitt og kominn í Landeyjahöfn tuttugu mínútum síðar. Eftir stutta bið eftir sjúkrabílnum sem flutti sjúklinginn að Landeyjahöfn var sjúklingur fluttur um borð og haldið aftur til Eyja. Aðgerðum dagsins var lokið rétt fyrir klukkan tvö, þegar björgunarskipið hafði verið fyllt af eldsneyti og klárt í útkall við bryggju.
Þetta var í fyrsta sinn í ár sem Þór sinnir sjúkraflutningum frá og til Vestmannaeyja, en þó nokkrir flutningar áttu sér stað í fyrra.
Meðfylgjandi eru myndir frá aðgerðum dagsins.
