Í áttunda skiptið er boðað til Eyjahjartans sem svo sannarlega hefur slegið í gegn, Þar rifjar fólk upp æskuárin í Eyjum, hvert frá sínu sjónarhorni. Hist verður í Einarsstofu á sunnudaginn kl. 13.00 og má búast við góðri aðsókn eins og fyrri skiptin. Það er því ástæða til að hvetja fólk að mæta tímanlega.
Þau sem koma fram eru Linda Kristín Ragnarsdóttir og kallar hún erindi sitt, Þegar öldur á Eiðinu brotna. Karl Gauti Hjaltason talar um árin sín í Eyjum. Sumar í Magnúsarbakaríi og nokkrar skrýtnar skrúfur, kallar Kristín Ástgeirsdóttir sitt erindi og Ólafur Jóhann Borgþórsson er í leit að ömmu og afa.
Þau sem standa að Eyjahjartanu eru Kári Bjarnason, Einar Gylfi Jónsson, Atli Ásmundsson og Þuríður Bernódusdóttir.
Vatnið
Helgina eftir verða tvær dagskrár í boði. Sú fyrri er á föstudeginum 12. október kl. 17:15-18:15 í Einarsstofu. Þar verða sýndar kvikmyndirnar Vand til Öerne frá NKT 1968 með íslenskum texta og Vatn til Eyja, RÚV 1968. Myndirnar, sem taka samtals um 40 mínútur í flutningi, marka lok á dagskrá til minningar um komu vatnsins til Vestmannaeyja fyrir 50 árum sem er án vafa eitt merkasta framfaraspor í sögu Vestmannaeyja. Á sunnudeginum 14. október kl. 13-14:30 í Sagnheimum munu Ragnar Óskarsson og Þórólfur Guðnason fjalla um árið 1918 í aðdraganda þess að á næsta ári eru 100 ár liðin frá því Vestmannaeyjabær fékk kaupstaðarréttindi.
Kötlugos
Þriðja helgin, sem markar lok fundaraða að þessu sinni, er helguð Kötlugosinu 1918 en í þessum mánuði eru rétt 100 ár liðin frá síðasta Kötlugosi. Sunnudaginn 21. okóber kl. 13-14 verður opnuð sýning á Kötlumyndum Kjartans Guðmundssonar auk þess sem ljósmynd eftir Gísla J. Johnsen sem sýnir Kötlugosið frá Vestmannaeyjum verður sýnd í fyrsta sinn opinberlega. Við opnun sýningarinnar verður boðið upp á fyrirlestur og spjall um hina illvígu eldstöð og hvers Vestmannaeyjar mega vænta er Katla vaknar af sínum Þyrnirósarsvefni.
Allar þessar dagskrár verða auglýstar betur er nær dregur.
