Það var skemmtileg og jólaleg stemmning í miðbæ Vestmannaeyja í gærkvöldi er verslunareigendur stóðu fyrir “Hátíð í bæ.”

Opið var í verslunum til kl. 22.00 og jólasveinar sáust á sveimi. Þá var komið fyrir söluskúrum í Bárustíg þar sem hægt var að versla sér t.a.m. heitt súkkulaði og ristaðar möndlur ásamt því að handverksfólk seldi vöru sína.

Áætlað er að endurtaka leikinn á morgun laugardag sem og á þorláksmessu (sunnudag) og má búast við því að stemmningin verði jafnvel enn meiri þá.

Óskar Pétur rölti rúnt um bæinn í gærkvöldi vopnaður myndavélinni og fangaði stemninguna.