Enn eru óveidd um 30.000 tonn af 120.000 tonna heildarkvóta Íslendinga í makríl þetta árið. Ekki hefur veiðst makríll síðan í ágúst og nú hefur flotinn snúið sér að veiðum á norsk-íslensku síldinni og hafa veiðar gengið vel.

„Makrílinn endaði þannig að við veiddum tæp 10.000 tonn og áttum eftir um 5500 tonn. Veiðin var frekar endaslepp þetta árið,“ segir Sindri Viðarsson sem stýrir uppsjávarsviði Vinnslustöðvarinnar í gær. „Síldveiðar ganga vel og Gullberg er að fara í síðasta túrinn á norsk-íslensku síldinni í kvöld. Þá verðum við búin að veiða um 6.500 tonn. Síðan förum við á íslensku sumargotssíldina í lok október.“

„Ísfélagið endaði í rúmum 8800 tonnum af makríl sem eru mikil vonbrigði miðað við síðustu ár,“ segir Eyþór Harðarson, útgerðarstjóri Ísfélagsins. „Það er hægt að geyma um 2200 tonn til næsta árs af þeim 8.000 tonnum sem eru óveidd af okkar kvóta. Veiðar í norsk-íslensku síldinni ganga vel þessa dagana og hafa okkar skip fiskað rúm 7000 tonn af 12.000 tonna kvóta. Við reiknum með að klára norsk-íslensku síldina í byrjun október. Tekur þá við kolmunnaveiði áður en við byrjum á íslensku síldinni.“