Í gær afhentu systkinin Pétur, Guðrún og Jóhann – fyrir hönd afkomenda Guðlaugar Pétursdóttur – Hollvinasamtökum Hraunbúða gjafabréf að upphæð 1.700.000,-.
Gjafabréfið er gefið til minningar um Guðlaugu Pétursdóttur frá Kirkjubæ og eru gefendur Guðrún Rannveig, Jónas Sigurður, Pétur Sævar og Jóhann Þór Jóhannsbörn auk maka, barna og barnabarna.
Halldóra Kristín Ágústsdóttir, formaður Hollvinasamtaka Hraunbúða vill fyrir hönd samtakanna koma á framfæri innilegu þakklæti fyrir þennan rausnalega styrk.
Hún segir að hluti af upphæðinni verði nýttur til kaupa á nýju þrekhjóli frá Fastus. ,,Við erum alltaf í góðu sambandi við starfsfólk og stjórnendur Hraunbúða upp á það hvað vantar hverju sinni.” segir hún.
,,Við leggjum mikið upp úr því að búa til upplifun fyrir heimilisfólkið og gera því dagamun. Nýverið buðum við t.d. fólkinu í kaffihúsaferð á Tangann og í bíltúr um eyjuna. Þá erum við að kaupa sogæðastígvél og fleira sem notað er í iðjuþjálfunina. Við höfum mikið styrkt Sonju Andrésdóttur í hennar frábæra starfi og vorum t.d. að styrkja hana í allskonar efni sem hún notar í föndurvinnu. Eins ætlum við að styrkja hana í að bjóða heimilisfólki á Vöruhúsið og þeir sem ekki komast fá matinn sendan heim. Svo erum við auðvitað með árlega viðburði eins og vorhátíð, konu- og karla-síðdegi, páskabingó, þrettánda-kaffi, jólahlaðborð og ýmsa tónlistarviðburði.” segir Halldóra og bætir við að samtökun séu í samstarfi við önnur félög við að kaupa aðra minigolf braut fyrir heimilið. ,,Þá tökum við fagnandi á móti ábendingum um hvernig við getum glatt fólkið okkar og létt þeim lífið.”
