Elísabet Guðnadóttir eða Eló eins og hún er kölluð var á dögunum valin bæjarlistamaður Vestmannaeyja 2025. Elísabet er fædd og uppalin hér í Eyjum og er komin úr mikilli tónlistarfjölskyldu. Hún byrjaði snemma í tónlistarskóla og fór í framhaldinu í frekara nám. Hún stundaði meðal annars nám í tónlistarskóla í Sydney í Ástralíu og þar kviknaði áhugi hennar á lagasmíði og upptökum. Eftir það fór hún í söngnám í tónlistarskóla FÍH. Elísabet tók þátt í Músíktilraunum árið 2024 og hafnaði í öðru sæti þar, en hún hlaut einnig verðlaun þá frá Félagi tónskálda og textahöfunda fyrir framúrskarandi lagasmíði. Elísabet hefur komið fram víða eftir það, meðal annars á Þjóðhátíð, Hljómey og Eldborg Í Hörpunni ásamt því að hita upp fyrir Ásgeir Trausta á Airwaves. Elísabet svaraði nokkrum spurningum fyrir Eyjafréttir.

Fullt nafn? Elísabet Guðnadóttir.

Fjölskylda? Mamma er Guðbjörg Guðjónsdóttir, pabbi er Guðni Hjálmarsson, systir er Jenný Guðnadóttir og bróðir er Hjálmar Carl Guðnason. Síðastur og ekki sístur er Karl William kærastinn minn.

Mottó? Klæðist einhverju sem mér líður vel í, elska að hafa það huggó.

Síðasta hámhorfið? Succession.

Uppáhalds hlaðvarp? Þarf alltaf að vera grín? Og Villtu finna milljón?

Aðaláhugamál? Handavinna, prjóna og hekla.

Eitthvað sem þú gerir á hverjum degi sem þú gætir ekki verið án? Góð húðrútína á morgnanna.

Hvað óttast þú mest? Að missa röddina mína.

Hvað er velgengni fyrir þér? Vellíðan og sjálfsöryggi í því sem maður tekur sér fyrir hendur.

Hvernig myndir þú lýsa tónlistarstílnum þínum? Hugguleg og hugljúf kántrískotin sálar tónlist.

Hvaðan færð þú innblástur fyrir tónlistina þína? Oftast fæ ég innblástur bara frá daglegum athöfnum, mistökum, draumum, hvað hefði geta gerst og svo framvegis. Oftast dugir til að setjast niður með góðan kaffibolla og byrja að skrifa texta og glamra eitthvað á gítarinn, eða bara fara í göngutúr í náttúrunni.

Hvað er á döfinni hjá þér í tónlistinni? Eitthvað spilerí og halda áfram að taka upp plötuna mína.

Eitthvað að lokum? Gleðilegt sumar!