Kvennalið ÍBV í handbolta sækir Val heim í þriðja leik úrslitaeinvígis liðanna um Íslandsmeistaratitilinn í dag. Leikurinn fer fram í N1-höllinni á Hlíðarenda og hefst klukkan 17:00.

Staðan í einvíginu er 2–0 fyrir Val sem er því einum sigri frá Íslandsmeistaratitlinum. Eyjakonur þurfa á sigri að halda til að halda einvíginu á lífi og knýja fram fjórða leik. Valur hefur haft betur í fyrstu tveimur leikjum liðanna, en ÍBV-liðið hefur sýnt á tímabilinu að það getur brugðist sterkt við þegar mest reynir á.

Handknattleiksdeild ÍBV hefur hvatt stuðningsmenn til að fjölmenna til Reykjavíkur og styðja liðið í þessum mikilvæga leik. Boðið verður upp á fría ferð með Herjólfi klukkan 12:00 frá Vestmannaeyjum og heimferð er áætluð með ferð Herjólfs klukkan 20:45. Einnig verður frítt í rútu í boði Viking Tours.

„Nú er engin afsökun – við þurfum alla með okkur,“ segir í tilkynningu frá handknattleiksdeildinni sem leggur áherslu á að skapa hávaða, hjarta og alvöru Eyjastemningu í stúkunni. Leikurinn verður sýndur beint á Sjónvarpi Símans.