Lögregla og sérsveit ríkislögreglustjóra fóru í aðgerðir við íbúðarhúsnæði á Fífilgötu í Vestmannaeyjum í gærkvöld þar sem maður vopnaður hnífi var handtekinn. Maðurinn var í kjölfarið fluttur til Reykjavíkur.

Stefán Jónsson, yfirlögregluþjónn hjá Lögreglunni í Vestmannaeyjum, staðfesti þetta í skriflegu svari við fyrirspurn Eyjafrétta í morgun.

Haft er eftir Arndísi Báru Ingimarsdóttur, lögreglustjóra í Vestmannaeyjum, á fréttavefnum mbl.is að lögreglan í Vestmannaeyjum hafi óskað eftir aðstoð sérsveitar ríkislögreglustjóra vegna málsins. Hún sagði aðgerðirnar hafa gengið vel og að þeim hefði lokið laust eftir miðnætti. Þá sagði hún jafnframt að ekki væri vitað til þess að neinn hefði hlotið líkamlega áverka.

Málið kom fyrst fram í umfjöllun fjölmiðla í gærkvöld þar sem greint var frá því að sérsveit ríkislögreglustjóra hefði verið kölluð til Vestmannaeyja vegna manns sem væri vopnaður hnífi. Aðgerðum lauk með handtöku án þess að til alvarlegra átaka kæmi eftir því sem næst verður komist.