Mugison hefur oft komið fram í Vestmannaeyjum á ferli sínum og ávallt fengið frábærar móttökur. Það er því tilhlökkunarefni að sjá og heyra hann á tónleikum á Skansinum annað kvöld, föstudag.

„Ég kem til Eyja að spila á Skansanum á föstudag klukkan 19.00,“ segir Mugison. „Í sumar er ég að spila á 30 útitónleikum vítt og breitt um landið og auðvitað var algjörlega nauðsynlegt að kíkja út í Eyjar. Nú er komið að því að gera Skansinn að tónleikahöll eitt kvöld.

Uppleggið er að spila úti í náttúrunni á mínum uppáhaldsstöðum og fátt er betra en Skansinn. Heimaklettur í baksýn, saft í brúsa og pönsur með sykri í nesti. Þetta verður geggjað,“ segir Mugison.

Miðar á tónleikana eru til sölu á Tix.is og veðurspá er góð.