Það færist sífellt meira líf yfir Herjólfsdal enda aðeins örfáir dagar þar til Þjóðhátíð verður sett. Undirbúningurinn er nú að ná hámarki og fjölmargar hendur vinna að því að gera Dalinn tilbúinn fyrir eina stærstu ferðahelgi ársins.

Halldór B. Halldórsson skellti sér í Herjólfsdal í dag og myndaði það sem fyrir augu bar. Eins og sjá má í myndbandinu er hátíðarsvæðið óðum að taka á sig kunnuglega Þjóðhátíðarmynd. Unnið er víða um Dalinn og kapp lagt á að ljúka öllum verkum áður en fyrstu gestirnir streyma inn á svæðið.

Að baki Þjóðhátíð liggur gríðarleg vinna starfsfólks, sjálfboðaliða og samstarfsaðila. Undirbúningurinn hefst löngu áður en hátíðin sjálf gengur í garð en síðustu dagarnir eru jafnan þeir annasömustu. Þá þarf að koma sviðum, tjöldum, veitingaaðstöðu og öðrum innviðum hátíðarinnar í endanlegt horf.

Þjóðhátíð verður sett í Herjólfsdal klukkan 14.30 næstkomandi föstudag. Síðar um daginn tekur við barnadagskrá en kvöldvakan hefst klukkan 21. Á föstudagskvöldinu verður einnig kveikt í brennunni og síðan tekur við fjölbreytt tónlistardagskrá fram á nótt.

Í myndbandi Halldórs gefst lesendum Eyjafrétta tækifæri til að skyggnast inn í Dalinn og sjá hvernig undirbúningurinn gekk fyrir sig í dag, þegar aðeins fáeinir dagar eru þar til hátíðin verður sett.