Lögreglan í Vestmannaeyjum biðlar til pysjubjörgunarfólks að fara að öllu með gát, sérstaklega þegar lundapysjum er sleppt við Ofanleitishamar.

Nú stendur pysjubjörgun sem hæst og fjöldi fólks leggur leið sína að Hamrinum til þess að sleppa pysjum. Lögreglu hafa borist ábendingar um að fólk standi fyrir utan hlaðna vegginn á svæðinu og að litlu hafi mátt muna að illa færi í að minnsta kosti tveimur tilvikum.

Í þeim tilfellum hafi börn misst pysju frá sér og reynt að ná henni aftur, en við það farið hættulega nærri hárri bjargsbrúninni.

Lögreglan hvetur pysjubjörgunarfólk því eindregið til að standa fyrir aftan vegginn þegar pysjum er sleppt.

„Pysjubjörgun skapar skemmtilegar og góðar minningar fyrir fjölskylduna og forsenda þess er að allir komi heilir heim,“ segir í tilkynningu lögreglunnar.