Á morgun, laugardag verður 100 ára afmælisatskákmót Taflfélags Vestmannaeyja haldið á opna svæðinu í Þekkingarsetri Vestmannaeyja að Ægisgötu 2, 2. hæð.

Mótið stendur frá kl. 12.00 til 18.00. Tímamörk eru 15 mínútur á skák að viðbættum fimm sekúndum fyrir hvern leik.

Rúmlega 30 keppendur víðs vegar að hafa skráð sig til leiks. Í hópnum eru þrír stórmeistarar auk fjölbreytts hóps skákmanna, en nokkrir keppenda bera alþjóðlega titla.

Hraðskákmót á sunnudag

Sunnudaginn 30. ágúst verður 100 ára afmælishraðskákmót félagsins haldið á sama stað frá kl. 13.00 til 16.00. Tímamörk eru fimm mínútur á skák að viðbættum þremur sekúndum fyrir hvern leik. Um 25 keppendur eru skráðir til leiks, þar á meðal stórmeistararnir þrír.

Skákstjóri beggja móta verður skákmeistarinn Ingvar Þór Jóhannesson, sem er ættaður frá Kirkjubæ í Vestmannaeyjum. Bæði mótin verða reiknuð til alþjóðlegra stiga. Ekkert þátttökugjald er á mótin og enn er opið fyrir skráningu á skak.is. Nánari upplýsingar eru einnig veittar í síma 822-0351.

Áhorfendur eru velkomnir að fylgjast með báðum mótunum. Nánari upplýsingar um mótin má finna í 100 ára afmælisblaði Taflfélags Vestmannaeyja, sem dreift er í Vestmannaeyjum í dag. Blaðið er jafnframt öllum aðgengilegt í opinni vefútgáfu hér á vef Eyjafrétta.

Afmælis- og ritnefnd skipa Arnar Sigurmundsson, Karl Gauti Hjaltason og Hallgrímur Steinsson. Sæþór Vídó annaðist umbrot blaðsins, Landsprent prentaði og Eyjadreifing sá um dreifingu þess í Vestmannaeyjum.

Frétt frá Taflfélagi Vestmannaeyja.