ÍBV tók á móti Þór í 21. umferð Bestu deildar karla á Hásteinsvelli í dag þar sem gestirnir fóru með 0-1 sigur af hólmi.

Fyrri hálfleikur var frekar tíðindalítill framan af og lítið um alvöru færi. Eyjamenn fengu gullið tækifæri eftir hálftíma leik til að komast yfir þegar Sigurður Arnar Magnússon var tekinn niður inn í teig Þórsara og Eyjamenn fengu vítaspyrnu. Vicente Valor fór á vítapunktinn en skot hans fór rétt framhjá markinu. 

Þórsarar náðu forystunni á lokamínútu fyrri hálfleiks. Þeir fengu þá aukaspyrnu á miðjum vallarhelmingi ÍBV sem Vilhelm Ottó Biering Ottósson tók. Hann sendi boltann inn á teig ÍBV og Sigfús Fannar Gunnarsson stýrði boltanum í netið. Staðan 0-1 í hálfleik. 

Eyjamenn fengu nokkur ágætis færi í síðari hálfleik til að jafna leikinn en markvörður Þórs, Aron Birkir Stefánsson, átti góðan leik í markinu. Þá átti Aron Lucas Vokes skot í utanverða stöngina þegar um tíu mínútur voru til leiksloka. Niðurstaða leiksins því 0-1 útisigur Þórsara.

ÍBV er komið í fallsæti í deildinni og er án sigurs í síðustu átta leikjum. Þeir sitja í 11. sæti með 17 stig. Þórsarar eru í sætinu fyrir ofan með 18 stig.

ÍBV 0 – 1 Þór

0-0 Vicente Rafael Valor Martínez (’30 , misnotað víti)

0-1 Sigfús Fannar Gunnarsson (’45 )

Rautt spjald: Bjarni Guðjón Brynjólfsson, Þór (’83)