Erlingur Richardsson og lærisveinar hans í GWD Minden eru úr leik í þýsku bikarkeppninni eftir naumt tap gegn Hagen, 33-32, í 16-liða úrslitum keppninnar í kvöld.

Þetta var fyrsta tap Minden undir stjórn Erlings en hann tók við liðinu í lok september.

Hagen hafði undirtökin lengst af og leiddi 15-11 í hálfleik. Mest náði Hagen sjö marka forskoti en Minden gafst ekki upp og tókst að jafna metin þegar tæp mínúta var til leiksloka. Hagen skoraði hins vegar sigurmarkið á lokasekúndum leiksins og tryggði sér þar með sæti í 8-liða úrslitum.

Bæði Minden og Hagen leika í þýsku B-deildinni. Minden situr í fimmta sæti deildarinnar en Hagen í því sjötta.