Erlingur Richardsson og lærisveinar hans hjá GWD Minden unnu sinn sjötta deildarleik í röð í gær þegar liðið lagði TV Emsdetten að velli, 29–35, í þýsku B-deildinni í handbolta.

Staðan var jöfn í hálfleik, 16–16, og var leikurinn jafn framan af síðari hálfleik. Minden náði hins vegar undirtökunum þegar leið á leikinn og tryggði sér að lokum sex marka sigur. Florian Kranzmann og Morten Hempel voru markahæstir hjá Minden með sjö mörk hvor.

Erlingur tók við þjálfun liðsins í lok september og hefur gengið vel síðan. Minden hefur unnið alla sex deildarleiki sína undir hans stjórn.

Eftir 11 umferðir er Minden í 6. sæti þýsku B-deildarinnar með 15 stig.

Næsti leikur liðsins er á föstudaginn, 20. nóvember kl. 20:00, þegar HSG Nordhorn-Lingen kemur í heimsókn í Kampa-Halle. Þar mætast feðgarnir Erlingur og Elmar en sá síðarnefndi leikur með Nordhorn-Lingen.