Bæjarráð Vestmannaeyja vill að skoðuð verði gerð viljayfirlýsingar vegna áforma um uppbyggingu 120 herbergja hótels í Hásteinsgryfju. Stjórnsýslu bæjarins hefur verið falið að vinna málið áfram. Þröstur B. Johnsen hefur óskað eftir að fá úthlutað landi í Hásteinsgryfju fyrir uppbyggingu 120 herbergja hótels. Umhverfis- og skipulagsráð vísaði erindinu til bæjarráðs þar sem lóðin sem um ræðir er ekki til úthlutunar. Á fundi bæjarráðs í liðinni viku kom fram að stjórnsýslan hefði farið yfir gögn um málið allt aftur til ársins 2011. Þá hefðu bæjarfulltrúar rætt við umsækjanda og aðra sem komið hafa að málinu í gegnum tíðina.

Viljayfirlýsing fyrsta skrefið

Bæjarstjóri og sviðsstjóri stjórnsýslu- og fjármálasviðs fóru yfir málið. Að mati bæjarráðs væri gerð viljayfirlýsingar eðlilegt fyrsta skref, miðað við umfang verkefnisins og sambærileg uppbyggingaráform sem sveitarfélagið hefur áður haft til meðferðar. Bæjarráð leggur til að skoðað verði hvort gera megi viljayfirlýsingu vegna verkefnisins, að uppfylltum þeim skilyrðum sem sveitarfélagið setur þegar sótt er um umfangsmikla uppbyggingu á landi sem ekki er til almennrar úthlutunar. Stjórnsýslunni hefur verið falið að vinna málið áfram.