Ekki tókst að hefja dýpkun í Landeyjahöfn á flóðinu síðdegis í dag þar sem aðstæður reyndust erfiðar. Samkvæmt upplýsingum frá G. Pétri Matthíassyni, upplýsingafulltrúa Vegagerðarinnar, var aldan yfir viðmiðunarmörkum þegar reynt var að hefja vinnu.

„Aldan var í hærri kantinum á flóðinu klukkan 17 og þótt dýpkunarskipið hafi reynt var hún yfir mörkum og ekki unnt að dýpka,“ segir Pétur.

Vonast til að vinna geti hafist í nótt

Horfur eru þó betri á næstu klukkustundum en spár gera ráð fyrir að aldan lækki í nótt og á morgun. „Það er spáð lækkandi öldu í nótt og á morgun og vonandi næst að hefja dýpkun í nótt,“ segir Pétur. Dýpkunarframkvæmdir við Landeyjahöfn eru mjög háðar sjólagi og aðeins hægt að vinna þegar alda er innan ákveðinna marka, sem hefur ítrekað tafið framgang verksins undanfarna daga.