- Eyjafréttir
- ·
- Fréttir
- ·
Ánægðir Eyjamenn!
Á gönguferð um helgina var ég að velta fyrir mér nýjum fréttum af því að Eyjamenn eru ekki aðeins ánægðastir allra landsmanna með búsetuskilyrði sín – heldur líka hamingjusamastir allra á Íslandi! Þá röðuðust upp í hausinn á mér ótrúlega margir jákvæðir hlutir sem hafa verið að gerast í Vestmannaeyjum síðustu misserin. Nefnum nokkra af handahófi í belg og biðu – og ekkert endilega í réttri tíma- eða mikilvægisröð:
- Ný nálgun við dýpkun Landeyjahafnar þar sem yfirlýst markmið er að halda henni opinni allt árið – og nú er að líða annar veturinn í röð þar sem höfnin hefur ekki lokast vegna sandburðar og grynninga.
- Fyrsta skrefið tekið í heildarúttekt á Landaeyjahöfn með það fyrir augum að bæta hana til framtíðar.
- Gerður nýr samningur um rekstur Herjólfs sem minnkar óvissu og áhættu bæjarins af rekstrinum.
- Air Iceland Connect ákveður að hefja áætlunarflug til Eyja í apríl og það tókst að tryggja lágmarksflugþjónustu við Eyjar þangað til.
- Samningar takast við Háskólann í Reykjavík og menntamálaráðuneytið um nám í íþróttafræðum á háskólastigi í Vestmannaeyjum.
- Samningur gerður við menntamálaráðuneytið, Háskóla Íslands og Samtök atvinnulífsins um rannsóknar- og þróunarverkefni við Grunnskóla Vestmannaeyja.
- Viljayfirlýsing undirrituð um gerð baðlóns í nýja hrauninu sem gæti orðið stórkostleg lyftistöng fyrir ferðaþjónustuna í bænum.
- Samningar vonandi að takast við tvö ráðuneyti um að reka stafræna smiðju sem hluta af Þekkingarsetri Vestmannaeyja.
- Ný samantekt sýnir að glæpatíðni er lægst í Vestmannaeyjum af öllum þeim stöðum á Íslandi sem kannaðir voru.
- Vestmannaeyjabær stefnir í að vera rekinn með afgangi á síðasta ári – þrátt fyrir covid og loðnubrest – og gert ráð fyrir afgangi á þessu ári líka.
- Og nú er loðnan komin eftir tveggja ára fjarveru!
Ég geri mér grein fyrir því að velgengni af því tagi sem hér er lýst er ekki endilega ávísun á aukna lífshamingju. En ég er viss um að hún hjálpar okkur Eyjamönnum til að brosa í kampinn – gleðjast yfir því sem hefur áunnist og horfa bjartsýn til þess sem er framundan.
Páll Magnússon
Nýjustu fréttir
Mest lesið
