Unnið er að tillögum um lengingu brimvarnargarða Landeyjahafnar á sama tíma og höfnin hefur verið lokuð vikum saman vegna ónægs dýpis. Frá þessu er greint á fréttavefnum Vísi.

Þar segir enn fremur að danska fyrirtækið DHI vinni nú að tillögum í samstarfi við Vegagerðina sem miða að því að bæta ástand hafnarinnar til framtíðar. Niðurstöður eru væntanlegar í vor, en í kjölfarið þurfa stjórnvöld að taka afstöðu til framkvæmda og kostnaðar.

Höfnin ekki verið dýpkuð um tíma

Á fundi bæjarstjórnar Vestmannaeyja nýverið kom fram að ekki hafi verið hægt að ráðast í dýpkun í langan tíma vegna veðuraðstæðna. Bæjarfulltrúar bentu á að staðan undirstriki hversu aðkallandi sé að ljúka uppbyggingu hafnarinnar, enda gegnir hún lykilhlutverki í samgöngum við Vestmannaeyjar.

Nokkrar leiðir til skoðunar

Samkvæmt Vegagerðinni eru nú til skoðunar ýmsar úrbætur. M.a. lenging brimvarnargarða, garðagerð á rifinu utan við höfnina og svokölluð „buffer“-dýpkun til að takast á við sandburð. Markmiðið er að tryggja áreiðanlegri siglingar og draga úr þeim vandamálum sem hafa fylgt höfninni frá upphafi.

Nýr verktaki tekur við í haust

Dýpkun hefur verið í höndum Björgunar undanfarin ár, en framkvæmdir hafa tafist bæði vegna bilunar í skipi og erfiðra veðuraðstæðna. Nýlega var samið við belgíska fyrirtækið Jan De Nul sem tekur við dýpkun frá og með haustinu.

Samið við Jan De Nul um dýpkun Landeyjahafnar

Vegagerðin hefur samið við belgíska dýpkunarfyrirtækið Jan De Nul um dýpkun Landeyjahafnar árin 2026 til 2029. Jan De Nul sérhæfir sig meðal annars í dýpkunarframkvæmdum og er meðal stærstu fyrirtækja heims á sínu sviði, með starfsemi víða um heim. Fram kemur í tilkynningu frá Vegagerðinni að verkefnið hafi verið boðið út í lok desember og […]